Podemos dicir que a Coral polifónica de Salcedo é xa un proxecto consolidado da Asociación. Arredor de 20 persoas integran hoxe en día a Coral, que foi presentada no ano 2008.

Coa creación desta agrupación quixemos render homenaxe aos pais e nais que no ano 1988 crearon a Banda de Música para que os seus fillos e fillas tivesen unha ocupación lúdico-formativo na parroquia de Salcedo, xa que nunha elevada porcentaxe son pais e nais, avós e avoas ou familiares de músicos quen integran a mesma.

Dende o ano 2009 a Coral Polifónica forma parte da Federación Coral Galega. Dentro da súa programación destacan a participación nas audicións de alumnos e alumnas da Escola de Música de Salcedo que se veñen celebrando no remate de cada trimestre, así como no festival de fin de curso da propia escola. Tamén participa no Ciclo Musical BMS e no concerto de Santa Icía, acompañando a Banda de Música de Salcedo.

O ano 2009 foi un ano de consolidación para esta agrupación, onde destaca o concerto conxunto que ofreceron coa BMS o día de Santa Icía e a participación no concerto de Nadal.

Enfócase o ano 2015 como un ano con novas expectativas e de novos proxectos para a Coral Polifónica, un ano de traballo e de crecemento coa súa Directora Dona Sonia Bouzada Pérez.

No ano 2015 a Coral resultou seleccionada para participar no III Certame de Corais Vila de Arbo e Festival de Corais da Deputación de Pontevedra. Xa no ano 2019 pasa a ser dirixida por Cristina Castro Pintos coa que continúan na actualidade.